Општина Штип доби средства од Агенцијата за финансиска поддршка во земјоделието и руралниот развој, во висина од 20 милиони денари кои ќе бидат наменети за асфалтирање на дел од локалниот пат кон село Почивало, во должина од 4 километри или 14.000 метри квадратни.

Се работи за пат кој беше долгогодишно барање на жителите во тие села, заради побезбедно движење до своите домови.

„Се работи за најтешката делница од овој пат, за којашто во контакт со граѓаните дојдов до сознание дека е најприоритетна и дека тоа е нешто коешто навистина и било потребно, со цел да можат непречено да функционираат.

Ние го добивме писмото преку коешто ни се одобруваат 20 милиони денари плус ДДВ, тоа би изнесувало 23.600.000 денари или околу 390.000 евра, средства за изградба на овој локален пат,“ изјави Бочварски.

Општина Штип ќе распише јавна набавка за избор на најповолен понудувач кој ќе ги врши градежните работи на овој локален пат Шашаварлија – Кошево – Почивало.